तीन दिवसाची ओली बाळंतीण
चिमुकल्याला घेवून निघाली बांधावर
झाडाला चिंध्यांचा बांधला पाळणा
विस्कटलेलं शरीर तसंच सैरभैर
पोटात रिचवलेली घोटभर आंबील
स्तनातून दूध कसं पाझरवेल बाहेर..
बाळंतपणाच्या वेदनांनी जितकं सोललं शरीर
त्याहून दुप्पट रोजनिशी सलत राहते
कुरुप झालेल्या पायात खंडीभर काटे
रस्ते हरवलेले पाय आपोआप फसतात रोवणीत
तेव्हा कुणीच ठेवत नाहीत तोंडावर बोट
जिंदगाणीच्या परिक्षेतून अशाच पासआऊट झालेल्या बाया
दरवेळी लेकराच्या रडण्याचा आवाज ऐकून
रोवणीच्या चिखलातच झिरपते थेंब
नजरअंदाज करुन ती ही घुसळते स्वरात सर
नाचगाण्यात साजरा होतो तीचा मुक्याटाचा चिखलोत्सव.
आशा, नर्स, अंगणवाडीबाईच्या छातीत भरली धडकी
डोक्यावर हात ठेवून करु लागल्या काळजीवाहू आटापिटा
चिमणीच्या पोटातच नाही दाणा पाणी
तर कसं ऐकवायचं चिऊंना खाऊंच्या गोष्टी
चिमुकल्याने मान टाकली खांद्यावर
तीन दिवसाची ओली बाळंतीण
चिमुकल्याला घेवून निघाली बांधावर
- अविनाश पोईनकर
कोई टिप्पणी नहीं:
एक टिप्पणी भेजें