झोप उडावी असे काहीसे...
========================

झोप उडावी असे काहीसे स्वप्न पडावे
काळोखाला मुठीत घेऊन विघ्न स्मरावे

तळपायाची आग जाहते झीज नसावी
उकिरड्यावर पोट रांगते भुक मसावी
कुणबी माती फळली नाही काय करावे ?
झोप उडावी असे काहीसे स्वप्न पडावे...

गाव पांगला दणकट हाडे ठिसूळ झाली
जन्म कोपला जणू लेकरे उदंड भ्याली
वाटाघाटीत प्रतिभेचे का सृजन मरावे ?
झोप उडावी असे काहीसे स्वप्न पडावे...

चहू दिशांनी बाजाराला खिडक्या दारे
विकार आले यंत्र फेकले तू विकले वारे
माती सोडून आकाशाचे का बोट धरावे ?
झोप उडावी असे काहीसे स्वप्न पडावे...

दुःख पांघरूण प्रदर्शनाचा ग्लोबल सूर्य
रे अस्सलतेचा ध्यास पुरेसा आतून ध्येर्य
अवखळ रस्ता काटे वेचत का झोपी जावे ?
झोप उडावी असे काहीसे स्वप्न पडावे...

- अविनाश पोईनकर
    बिबी, जि. चंद्रपूर
    ७३८५८६६०५९

==========================